ராமா ராமா

ராகம்: அடானா

ராமா ராமா என்று சொல் மனமே

நாவிற்கினிய நாமம் தன்னை துதி மனமே

கோசலை குமாரனை ரகுகுல திலகனே

போற்றிப் பாடுவாய் அனுதினமே    ....   ( ராமா ராமா)

 

ராகம்: சாரங்கா

தாடகை சுபாஹுவை வதைத்தவனை

மாமுனி வேள்வியை காத்தவனை

கல்லுருவாய் நின்ற அகலிகையின்

சாபத்தை போக்கிய நாரணனை   ....  ( ராமா ராமா )

 

ராகம்: வஸந்தா

சிவத்தனுசை முறித்த சுந்தரனை

ஜானகியை மணந்த சீதாராமனை

தந்தை சொல் காக்க வனம் புகுந்தவனை

தம்பி பரதனுக்கு அரசு தந்தவனை   ...  ( ராமா ராமா)

 

ராகம்: பூபாளம்

மாரீச மாயனை கொன்றவனை

வஞ்சத்தால் சீதையை இழந்தவனை

அனுமன் பூஜித்த ஸ்ரீராமனை

சுக்ரீவன் நட்பை பெற்றவனை   ....   ( ராமா ராமா )

 

ராகம்: சஹானா

வாலியை வதம் செய்த மாவீரனை

அபயமென அடைந்த விபீடணனை

தஞ்சமென்று வந்தால் பகைவரையும்

காத்திடுவேன் என்று சொன்னவனை   .... ( ராமா ராமா )

 

ராகம்: பிலஹரி

கடல் கடக்க சேது அமைத்தவனை

முழங்கி எழுந்த கும்பகர்ணனை

வீரியம் மிகுந்த ராமபாணத்தால்

மலை போல் தரையில் சாய்த்தவனை  ...  ( ராமா ராமா )

 

ராகம்: ஷண்முகுப்ரியா

தசமுகனாம் கொடிய ராவணனை

போரினில் மாய்த்த ஜெயராமனை

சீதை மனம் குளிர தேவர் குலம் மகிழ

பூதேவியை தன்னுள் அணைத்தவனை   ...  ( ராமா ராமா )

 

ராகம்: மோகனம்

அயோத்தி நகர் மீண்ட அயோத்தி ராமனை

அரசுரிமை அடைந்த பட்டாபிராமனை

ரகுகுல விளக்கை சுகுமாரனை

போற்றிப் பாடுவாய் அனுதினமே  .... ( ராமா ராமா )

 

ராகம்: கேதார கௌளை

அரக்கர் குலம் அழிக்க தோன்றியவனை

நாட்டில் நலம் செழிக்க செய்தவனை

இன்று நாம் சேவிப்போம் திருமலையில்

ஸ்ரீராமனை திருவேங்கடவனை   .... ( ராமா ராமா )

 

ராகம்: மத்யமாவதி

சக்ரவர்த்தி திருமகனுக்கு ஜெய மங்களம்

சௌபாக்ய சொரூபனுக்கு ஜெய மங்களம்

பட்டாபிராமனுக்கு சுப மங்களம்

ஸ்ரீனிவாசனுக்கு சுப மங்களம்

 

Click Here for AUDIO ( under construction)

Top

Songs Index